Tre të rinj janë arrestuar në Kosovë për sulme kibernetike. Autoritetet në bashkëpunim me FBI në SHBA kanë zbuluar tre të rinjve në Prishtinë që ishin pjesë e një grupi hakerash.
Ata kishin krijuar plaforma online që aksesoheshin vetëm në DarkWeb, dhe përmes saj kryenin veprimtari të paligjshme kibernetike.
Të rinjtë e moshave 22-24 vjeç shisnin të dhëna elektronike pasi vidhnin karta krediti, fusnin viruse kompjuterike, dhe kryenin sulme kibernetike ndaj adresave të ndryshme.
Mjete teknologjike përfshirë dhe 2 mijë e 625 euro janë sekuestruar tashmë.
NJOFTIMI NGA POLICIA E KOSOVËS
ARRESTOHEN TRE (3) PERSONA TË DYSHUAR PËR KRIME KIBERNETIKE
Prishtinë, 17 shtator 2020
Sektori për Hetime të Krimeve Kibernetike në Policinë e Kosovës, pas një hetimi të gjatë dhe në bashkëpunim me autoritetet e ShBA-së, konkretisht me FBI-në si dhe në mbështetje të Prokurorit të Shtetit – PTh Prishtinë, me datë 16.09.2020 pas marrjes së veprimeve hetimore dhe operacionale ka arrestuar tre (3) persona të dyshuar se kanë kryer veprën penale ”Hyrje në Sistem Kompjuterik”.
Të dyshuarit ishin pjesë e një grupi hakerësh, ata shënjestronin platforma të ndryshme online të cilat posedonin të dhëna kompjuterike të ndjeshme. Pastaj, në bashkëveprim me njëri tjetrin përmes sistemeve kompjuterike kanë krijuar një platformë online e qasshme vetëm në DARKWEB (DARKWEB ka të bëj me internetin e fshehur i cili përdoret për qëllime të paligjshme) dhe përmes saj është kryer veprimtari e paligjshme kibernetike.
Në këtë platformë të dyshuarit në vazhdimësi kanë vendosur dhe shitur të dhëna të ndryshme elektronike, të cilat paraprakisht i kanë siguruar përmes veprimeve të paligjshme online, si kredit kartela të vjedhura në shumë shtete të botës, virusë të ndryshëm kompjuterik, “mjete” për sulme kibernetike, e-mail adresa dhe fjalëkalime, numra të telefonit si dhe të dhëna tjera.
Këto të dhëna dhe “mjete” kanë mundësuar edhe kryerjen e veprimtarive tjera kriminale.
Të dyshuarit e arrestuar janë:
– E.J, 1998;
– Ç.B, 1998;
– V.S, 1996.
Janë kontrolluar dy lokacione dhe në cilësinë e provave janë sekuestruar:
– Shtatë shtëpiza kompjuteri;
– Tre kompjuter laptop;
– Katër hard disqe;
– Shtatë telefona mobile;
– Pesë USB memorje;
– Dy mikro SD memorje;
– Para të gatshme – 2625 euro;
– Dokumentacione të ndryshme.
Me vendim të Prokurorit tre (3) të dyshuarit janë dërguar në mbajtje për procedura të mëtejme ligjore.
