Glauk Olldashi, djali i ish-ministrit të ndjerë Sokol Olldashi, ka dalë në krah të Sali Berishës, duke iu bashkuar Foltores së ish-kryeministrit.
I ftuar në emisionin “Të Paekspozuarit”, ai u pyet se përse është në krah të Berishës, kur ky i fundit nuk e mbështeti babanë e tij në zgjedhjet për kryetar të PD-së në vitin 2013.
“Jeta është një ironi e vërtetë”, u përgjigj Olldashi, teksa shtoi se Berisha është i vetmi që mund të nisë një PD ndryshe ku forumet funksionojnë.
Pjesë nga debati në studio:
Glauk Olldashi: Sa i përket mbështetjes së forumit rinor ndaj doktorit nuk është thjesht si individ, por është më shumë mbështetje ndaj kauzës që ai ka marrë përsipër të na drejtojë. Një kauzë që është ngritur jo pak herë nga ne, por nga shumë aktivistë të PD, që sot nuk janë më pjesë e saj fatkeqësisht. Deri tani asnjë nga ne nuk ka patur fuqinë e duhur politike për ta kthyer këtë kauzë në një lëvizje të suksesshme.
Advertisements
Ylli Rakipi: Zoti Olldashi, në vitin 2013 babai juaj mendonte se do të kishte zgjedhje të vërteta në PD për kryetarin, por nuk ndodhi kështu. Këtë gjë në fakt e bëri edhe Sali Berisha. Përse e mbështesni ju sot?
Arjan Curri: Pse Glauku mbështet doktorin, ndërkohë që ai nuk e ka mbështetur babain e tij dikur?
Glauk Olldashi: Jeta është një ironi e madhe!
Arjan Curri: Ju thatë që nuk e mbështesni Berishën si individ por kauzën. E besoni kauzën?
Glauk Olldashi: Kjo që po diskutonit pak më parë. E thënë pak më ndryshe, do të ishte që, ai që filloi etapën e demokracisë në vendin tonë, për ironi të fatit është edhe ai që ka mundësinë më të madhe që ta mbyllë këtë etape dhe të nisë një PD ku forumet funksionojnë, ku kryesia e partisë është funksionale dhe një PD që frymëzon demokratët dhe është shembull, jo vetëm për demokratët por të gjithë shqiptarët.
/SHQIPERIA IME GRUP
