Shqipëria, peng i kujt…?Nga Clirim Hoxha

Clirim Hoxha
Shqipëria, peng i kujt…?

Të flasësh sot për të rinj politikan me ambicie dhe të mos t’i lejosh të marrin përsipër poste të rëndësishme, nuk më duket bindëse. Kemi disa shembuj në politikën shqiptare me Majkon dhe Metën që u bënë kryeministra në moshën 28 vjeçare.

Kemi Metën Ministër të Jashtëm pa qenë një ditë ambasador apo diplomat. Kemi Bashën Ministër i Jashtëm pa qenë një ditë ambasador apo diplomat karriere. Kemi Tritan Shehun Ministër i Jashtëm me profesion mjek, pa qenë asnjë ditë ambasador apo diplomat karriere. Kemi Haxhinaston Ministër i Jashtëm, apo Panaritin pa qenë asnjë ditë ambasador apo diplomat karriere. Dhe kemi sot Gent Cakajn që propozohet për Ministër të Jashtëm në moshën 28 vjeçare, duke qenë zëvendës ministër i jashtëm, por nuk e do Presidenti duke shkelur kushtetutën.

Është e drejta e çdo Kryeministri që të formatoi kabinetin e tij qeveritar me ata ministra që mendon ai. Këtë të drejtë ja jep ligji, ja jep vota e popullit që Rama e ka me shumicë. Përgjegjësia e qeverisjes i mbetet kryeministrit dhe për çdo ministër të propozuar dhe kërkuar kryeministri mban përgjegjësinë e tij përpara popullit, i cili reagon nëpërmjet votës së lirë në zgjedhjet e radhës.

Si mendoni miq, a mund të veproi me kokën e tij një ministër i jashtëm pa u konsultuar me kryeministrin për çdo qëndrim, për çdo deklarim dhe për çdo veprim? Me siguri që jo. Atëherë, përse Meta nuk e dekreton zotin Gent Caka si ministër për Europën dhe Punët e Jashtme?!

Por me sa po shikojmë, këtu nuk është fjala për mos dekretimin e ministrit të jashtëm. Problemi është më i thellë. Kërkohet me çdo kusht që Ramës dhe Qeverisë së tij ti vihen shkopinj nënë rrota. Kërkohet destabilizimi me çdo kusht i Shqipërisë përmes protestave studentore etj, me qëllim bllokimin e institucioneve të reja SPAK dhe Byroja e Hetimit, të cilat do të bëjnë që tju iki zëri të gjithë politikanëve të përlyer. (duhet të krijohen deri në fund të marsit)

Por gjithashtu, kërkohet rrëzimi i kësaj qeverie për të shembur ëndrrën e madhe të shqiptarëve për bashkimin kombëtar.

Të gjitha këto mendoj se janë shkaqet e kësaj situate, por ajo që është më kryesorja, populli i ndershëm shqiptar i ka kuptuar të gjitha dhe distancohet nga grupet e qëllimeve të këqija, të cilët të nxitur nga ata që e kanë mizën nënë kësulë, si dhe nga sponsorizuesit fqinjë të destabilizimit, kërkojnë ta mbajnë peng këtë vend dhe këtë popull.