Në puntatën e djeshme të “Dua të të bëj të lumtur” u fol për një histori mjaft emocionuese dhe e dhimbshme. Bëhet fjalë për nënën Sano e cila kishte 10 vite pa u takuar me të bijën.
Nënë Sano në moshën 14 vjeçare ishte njohur me bashkëshortin e saj, Halitin dhe kishin rënë në dashuri me shikim të parë. Familja e nënë Sanos nuk e kishte pranuar këtë martesë dhe për këtë arsye Haliti e kishte rrëmbyer, ndërsa nga martesa kishin ardhur në jetë 4 fëmijë.
Pas disa vitesh nënë Sano zbuloi që bashkëshorti i saj, Haliti kishte dy fëmijë me një grua tjetër. Në këtë moment midis tyre kishin lindur shumë konflikte dhe si përfundim Haliti me Sanon ishin ndarë.
Gjendja e rënduar ekonomike e kishte detyruar nënë Sanon që të martohej përsëri, por ky vendim nuk ishte pranuar nga fëmijët e saj. Sano i ishte drejtuar programit “Dua të të bëj të lumtur” për t’u bashkuar sërish me vajzën e saj dhe për t’i kërkuar falje për vendimet e marra.
Vajza e saj, Mira nuk e kishte pranuar ftesën dhe kjo e pikëlloi nënë Sanon. Gjithsesi Arbana , për të mos e lënë të vetme, kishte ftuar shoqen e saj, Lumturijen. Kjo e fundit rrëfeu shoqërinë 40 vjeçare që kishte me Sanon dhe shprehu se ajo nuk kishte pse të shkonte në shtëpinë e të moshuarve kur kishte katër fëmijë.
