Aksident në Turqi – Humbin jetën 4 anëtarë nga e njëjta familje

4 anëtarë të së njëjtës familje kanë humbur jetën dhe një tjetër është në gjendje të rëndë pasi makina me të cilën po udhëtonin ra nga një lartësi prej 3 metrash në një përrua.

Aksidenti tragjik ka ndodhur rreth orës 15:30 të së enjtes në rrugën Karabuk- Zonguldak, në Turqi, kur automjeti i drejtuar nga 66-vjeçari S. Kocabaş doli nga rruga dhe përfundoi në përrua.

Pas njoftimit nga ana e dëshmitarëve okularë, në vendngjarje mbërritën ekipet e ndihmës së shpejtë dhe të policisë.

Pas kontrollit të mjekëve, rezultoi se në aksident kishin humbur jetën shoferi dhe bashkëshortja e tij 65-vjeçare, nusja e djalit të tyre 32-vjeçe dhe një mbesë. Ndërsa nipi 4 vjeçar ndodhet në gjendje kritike për jetën.

Autoritetet kanë nisur hetimet për zbardhjen e shkaqeve të aksidentit që u mori jetën 4 personave. /tvklan.al