Gazetarja Dorjana Bezat raporton për “BalkanWeb” se policia ka arrestuar të plagosurin Armando Sulejmani pasi i ka gjetur një armë zjarri pa leje. Arrestimi iu komunikua në spital ku po merr mjekim pas plagosjes.
“Në vijim të veprimeve hetimore në lidhje me ngjarjen e djeshme, policia ka arrestuar në flagrancë 43 vjeçarin A.S., për veprën penale “Mbajtja pa leje dhe prodhimi i armëve, armëve shpërthyese dhe municioneve”. Po punohet për zbulimin dhe kapjen e autorëve. Për arsye hetimi nuk japim detaje të tjera“- thuhet në njoftimin e policisë.
42-vjeçari dyshohet se ka qenë dhe shënjestra e atentatit për shkak të së kaluarës së tij dhe precedentëve. Sulejmani është një emër i njohur për policinë pasi në vitin 2016 i ka shpëtuar një tjetër atentati. Ai njihet ndryshe dhe me nofkën “Çipuri” dhe dyshohet se ka qenë anëtari bandës së Gaxhait.
Në lidhje me këtë ngjarje është ngritur një grup hetimor me ekspertë nga policia e Vlorës dhe drejtoria e përgjithshme të cilët po hetojnë dhe kanë shoqëruar 17 persona.
Në vendngjarje janë gjetur 90 gëzhoja dhe dyshohet se viktimave u është ngritur pritë. Në momentin që kanë mbërritur në zonë makina e viktimave, atentatorët e kane ndjekur nga pas për disa metra dhe kur është hapur zjarr kanë ecur paralel. Viktimat nuk kane pasur mundësi reagimi.
Vendi është zgjedhur nga atentatorët pasi i gjithë aksi nuk ka kamera sigurie. Gjithashtu mësohet se në makinën e vrasësve e cila rezulton e vjedhur janë gjetur 3 armë automatike, por asnjë prove identifikuese.
(BalkanWeb)
