Ministrja e Arsimit Besa Shahini, uroi sot mësuesit në gjithë vendin me rastin e Festës së 7 Marsit.
Përmes një videomesazhi, Shahini iu drejtua veçanërisht një kategorie mësuesish që sakrifikojnë duke punuar në kushte më të vështira se kolegët e tyre.
“Ju drejtohem për t’ju falënderuar për punën që e bëni me shumë përkushtim dhe për sakrificën e madhe të përditshme që bëni për arsimimin e brezave të rinj”, iu drejtua Shahini mësuesve në gjithë vendin.
Ajo falënderoi veçanërisht mësuesit e klasave kolektive, që punojnë në kushte të vështira me nxënës të grupmoshave të ndryshme, duke u munduar dhe përpjekur që edhe atyre t’u japim më të mirën.
“Dua të falënderoj mësuesit ndihmës që luajnë një rol të jashtëzakonshëm në jetën e fëmijëve me nevoja të veçanta, të cilët ne duam që të arrijnë potencialin e vetë maksimal brenda sistemit arsimor shqiptar”, tha Shahini.
Një falënderim të veçantë ajo shprehu për mësuesit e gjimnazeve, të cilët sivjet si çdo vit tjetër, kanë punë me maturantët, të menaxhojnë ankthet e tyre jo vetëm për testin e maturës, por edhe për të ardhmen e tyre.
“Ndaj, një falënderim i veçantë për ju. Gëzuar 7 Marsin”, uroi ministrja Shahini./atsh/
