Infermieria është një mision dhe profesion i rëndësishëm në shërbimin publik.
Kështu u theksua sot në aktivitetin e zhvilluar në kuadër të Ditës Ndërkombëtare të Infermierëve, organizuar nga Urdhri i Infermierëve të qarkut Gjirokastër.
Të pranishëm në këtë aktivitet ishin prefekti i qarkut Gjirokastër, Astrit Aliaj, presidentja e Urdhrit të Infermierit për qarkun Gjirokastër, Mimoza Llavdaniti, përfaqësues nga Këshilli i Qarkut, Ylli Alika si dhe punonjës të sistemit të shërbimit shëndetësor të qarkut Gjirokastër.
Në fjalën e tij, prefekti Aliaj vlerësoi punën e infermierëve në drejtim të shërbimit 24 orë ndaj pacientëve ku spikat humanizmi, profesionalizmi, gatishmëria.
“Ndër faktorët e shumtë që kontribuojnë në cilësinë e shërbimeve shëndetësore kanë të bëjnë me kompetencat e personelit ku rol të rëndësishëm luajnë edhe infermierët”, theksoi Aliaj.
Gjatë zhvillimit të aktivitetit u shpërndanë disa certifikata mirënjohjeje për infermierët e qarkut Gjirokastër, të cilët kanë dhënë kontributin e tyre për kujdesin shëndetësor dhe human ndaj komunitetit./atsh
