Me arra dhe mjaltë, nëse dëshironi edhe me pak kanellë, receta e ftonjve dhe mollëve të pjekura në furrë është fantastike në shije
Kjo është një ëmbëlsirë tipike e fshatrave shqiptare, e përgatitur në ditët e fohta të vjeshtës e sidomos dimrit, është fantastike jo vetëm në shije por edhe në vlera.
Krejt lehtë për t’u përgatitur në kushtet e shtëpisë, me pak përbërës dhe brenda një kohe të shkurtër, ftonjtë dhe mollët e pjekura përbëjnë ëmbëlsirën ideale pas një vakti dreke e veçanërisht darke.
Shija e përqëndruar e ftonjve, kombinuar ëmbëlsinë e mollëve dhe me mjaltin e arrat është fantastike por nga ana tjetër po aq fantastike janë edhe vlerat shëndetësore të kësaj ëmbëlsire.
Ftoi është një frut që nuk të shpenzon shumë kohë nëse do ta konsumosh menjëherë.
Ai është shumë i shijshëm dhe shumë i rëndësishëm për shëndetin e njeriut.
Ftoi është një burim i pasur me vitaminë C, kalium, bakër, hekur dhe fibër.
Ftoi gjithashtu përmban elementë organikë dhe ushqimorë që ia shumëfishojnë vlerat shëndetësore atij.
Nga ana tjetër molla njihet për vlera dhe përbërës të jashtëzakonshëm ushqimorë që të mbrojnë nga një sërë simptomash dhe sëmundjesh.
Mollët mbrojnë qelizat bazë të sistemit nervor nga neurotoksinat dhe ulin ndjeshëm rrezikun e çrregullimeve mendore, siç është edhe sëmundja e Alzheimerit
Studimet kanë treguar që konsumimi i mollës ul ndjeshëm rrezikun e goditjeve në tru.
Shqiptarët e shfrytëzojnë ftoin e mollën gjërësisht.
Këto fruta i përdorin për reçel, ëmbëlsira, puding, gliko, por edhe në mënyra të ngjashme me dardhën.
Sipas kërkimeve të AgroWeb.org, vlerat e vërteta të ftoit dhe mollës gjenden jo vetëm të lëkura, por edhe tek tuli i brendshëm që është i mbushur me ushqyes të rëndësishëm, vitamina, minerale, antioksidantë dhe fibër.
Me ndihmën e pak sheqer ose edhe të mjaltit, frutat marrin një shije fantastike.
Më poshtë do të gjeni recetën e sugjeruar nga AgroWeb.org për përgatitjen e ftonjve dhe mollëve të pjekura në furrë.
Ftonj dhe Mollë të Pjekura në Shtëpi
Përbërësit
(Sasia e ftonjve dhe mollëve përzgjidhet në bazë të numrit të personave në familje)
Ftonj
Mollë
Mjaltë
Arra
Pak sheqer
Kanellë ose Karafila (Sipas dëshirës)
Përgatitja – Shpejt dhe Lehtë
Pastrojini mirë ftonjtë duke u hequr fillimisht pushin në sipërfaqen e lëkurës përmes një pecete të pastër. Ndërsa mollët shpëlaini me ujë të bollshëm.
Më pas, përmes një thike ndajini ftonjtë dhe mollët në dy ose katër pjesë (sipas preferencës).
Pastrojini nga farat në secilën prej pjesëve.
Më pas, secilin prej copave të ftonjve e mollëve i lyejmë me pak sheqer nga të dyja anët dhe vendosini me radhë në një tavë ku kemi shtruar më parë letër pjekjeje.
I pjekim në furrë me temperaturë 200 gradë përreth 40 minuta.
Ndërkohë, në një tas të vogël hedhim disa lugë me mjaltë dhe arra të shtypura.
Pasi ftontjë dhe mollët të jenë karamelizuar i heqim nga furra dhe u hedhim sipër mjaltin me arra.
Sipas dëshirës mund t’i spërkasim me pak pluhur kanellë ose disa karafila. Kjo ëmbëlsirë shërbehet e ngrohtë por edhe ftohtë. /AgroWeb.org
