Pjekja e mishit dhe e peshkut e ka zanafillën e hershme, që kur njerëzit njohën zjarrin dhe ne, edhe sot e kësaj dite, vazhdojmë të pjekim dhe na pëlqen shumë kjo gjë. Thuhet që mjeshtër të mishit të pjekur kanë qenë grekët. Të kalosh ditën me një zgarë të mirë në kopsht, është e këndshme, pasi është një rast i mirë për t’u mbledhur me miq apo të afërm, kurse gratë do të kënaqen edhe më shumë, sepse zgara, në përgjithësi, është detyrë e burrave. Era e mishit të pjekur që mbush gjithë kopshtin, bën që të na shkojë goja lëng sapo ta ndiejmë në ajër. Ama, që kjo drekë ose darkë të jetë e përsosur dhe të kënaqemi të gjithë, duhet t’u kushtojmë vëmendje disa detajeve të vogla por të domosdoshme. Fillimisht, duhet të vendosim se çfarë do të pjekim në zgarë: mish, peshk apo perime. Nëse duam të pjekim mish të bardhë, fillimisht duhet ta marinojmë, në të kundërt, mund të na thahet gjatë pjekjes. Nëse duam të bëjmë peshkë, mund të përdorim çdolloj peshku, përfshirë edhe frutat e detit. Nuk mund të mungojnë piperi e majdanozi, limoni, vaji i ullirit, gjethet e rozmarinës, uthulla, dafina e sherbela.
Marinimi për mishin e bardhë ose atë të pulës
Në një tas, përziejmë 130 g kos, 1 lugë të vogël curry (lloj erëze), majdanoz të grirë, lëngun e një limoni, piper kokërr dhe një thelb hudhër të ngirë në copa. Më pas, hedhim copat e mishit, i përziejmë dhe i lëmë të marinohen për 2 orë. Pastaj i vendosim në zgaraë. Rezultati? Të lëpish gishtat.
Marinimi i peshkut
E vendosim peshkun në një enë. Më pas, shtojmë pak majdanoz të grirë hollë, hudhër, lëng limoni dhe gjethe trumze (nëse e keni).
Shënim: në të dyja rastet, përpara se mishi të piqet në zgarë, duhet të kullohet mirë nga lëngu i marinimit, si dhe të thahet me letër thithëse kuzhine.
Source: living. al
