Kryeministri Edi Rama dhe kryetari i bashkisë Erion Veliaj i dorëzuan çelësat e banesës së re zonjës së shtëpisë Sadihe Materës, e cila nuk do të duhet më të mendojë për çatinë e shkatërruar dhe për rrezikun që i kanosej çdo ditë nga amortizimi i banesës dhe që me tërmetin pësoi shkatërrimin total.
Kreu i qeverisë u shpreh se sikurse kjo banesë e cila është bërë shumë herë më e mirë se ajo që ishte para se të dëmtohej nga tërmeti, edhe shtëpitë e tjera do të jenë model. “Keni kaluar pa dëmtime në shëndet. Kjo është kryesorja. Të tjerat pastaj, më mirë bëhet. Shtëpia është më e mirë se ajo që ishte. Të gjithë ata që kanë pasur dëme do t’ua bëjmë shtëpinë më të mirë”, tha Rama.
Kryeministri u interesua që shtëpisë së re të Ramazanit të mos i mungojë asgjë nga pajisjet e domosdoshme elektroshtëpiake, ndërsa bashkëbisedoi me fëmijët e familjes për shkollën që ata ndjekin dhe punët që kryejnë në bujqësi në fermën e tyre.
“Shyqyr që tërmeti i 21 shtatorit kaloi pa dëmtime në shëndetin tuaj. Të gjithë atyre që kanë pasur dëme, do t’jua bëjmë shtëpinë më të mirë seç e kishin”, – tha Kryeministri Rama. Kreu i qeverisë inkurajoi fëmijët të ndjekin shkollën e mesme profesionale duke iu siguruar atyre siç tha ai, se “shkolla profesionale është punë e sigurt”.
Kryetari i bashkisë së Tiranës, Erion Veliaj tha se një nga synimet ka qenë që banesat e reja që po ndërtohen pas tërmetit të jenë më të forta dhe me kushte shumë herë më të mira duke vendosur një standard të ri. “Jo çdo e keqe vjen për keq. Edhe me porosinë e kryeministrit, dhe me ndihmën e miqve tanë, jemi dita me natën”, tha Veliaj. e.xh. Atsh
