Policia e Tiranë arrestoi ish-futbollistin e Kombëtares shqiptare, Klodian Duro.
Ai është prangosur në flagrancë mesnatën e datës 25 mars pasi ka shkuar në banesën e ish-bashkëshortes duke thyer urdhrin e mbrojtjes që gjykata kishte lëshuar në favor të saj.
Duro u arrestua me akuzën e përndjekjes dhe kanosjes ndaj ish-bashkëshortes, me të cilën ishte divorcuar një vit më parë.
Ajo banonte në zonën e “Bllokut” dhe kishte urdhër mbrojtje që nga momenti i divorcit. Ish-bashkëshortja e ka denoncuar vazhdimisht Duron për dhunë fizike e psikologjike si dhe kanosje e përndjekje përmes SMS-ve.
Dy ditë më parë Duro ka shkuar në shtëpinë e ish-gruas duke i rënë derës, ndërsa ajo ka njoftuar menjëherë policinë.
Efektivët kanë mbërritur duke e arrestuar në flagrancë. Duro është shprehur se ka qenë aty thjesht për ta takuar.
