Leo Messi nuk flet shpesh, por kur e bën diçka të tillë, Barcelona dridhet.
Kështu ndodhi pas sfidës kundër Osasuna, një humbje me shije të hidhur pasi në të njëjtën kohë Real Madrid festoi titullin kampion:
“Nuk e prisnin këtë epilog, por e gjithë kjo konfirmon krizën e këtij sezoni. Jemi një skuadër e dobët dhe pak korrekte, një skuadër e cila ka humbur pikë aty ku nuk duhej.
Madridi bëri të kundërtën, pas rifillimit të sezonit nuk humbi asnjë ndeshje. Ne kemi humbur shumë pikë dhe duhet të bëjmë autokritikë, duke nisur nga ne lojtarët dhe deri tek të gjithë të tjerët. Ne jemi Barcelona dhe jemi të detyruar ti fitojmë të gjithë ndeshjet.
Skuadra, vijon më tej Messi, ka lënë shumë për të dëshiruar dhe këtë e ka bërë në shumë ndeshje.
Nëse vazhdojmë kështu do të jetë shumë e vështirë të fitojmë Champions League. Tani kemi nevojë për pak pushim e më pas të përqendrohemi në Champions.
Gjithçka fillon nga pika zero. A jam i mërzitur? Është normale, të gjithë në klub janë. Njerëzit po humbasin durim pasi ne nuk po bëjmë asnjë për të ndryshuar”, u shpreh Messi duke e bërë edhe më të hidhur këtë humbje përballe Osasuna.
