Partia Demokratike i kërkon SPAK-ut që të nisë hetimet kundër ministres së Shëndetësisë Ogerta Manastirliu lidhur me videon e djeshme që publikoi me pamjet, sipas saj brenda Infektivit, ku të sëmurët me COVID luftojnë cdo moment me vdekjen.
E ndërsa e cilëson videon si terror për qytetarët, ish-deputeti demokrat Bardh Spahia shprehet se SPAK duhet të hetojë Manastirliun sepse pamjet janë të rreme.
Në videon e postuar dje nga ministrja, që Spahia i kërkon dorëheqjen, shfaqen disa të sëmurë duke rënkuar, mes tyre një e moshuar, që sipas ministrisë ishte te Infektivi, por ish-deputeti demokrat thotë se qytetari e ka njohur gjyshen e tij, e cila nuk ka qenë e infektuar me COVID dhe se gjithçka që paraqet ministria është false. Më pas, Spahia, ndalet te kushtet brenda Infektivit.
Ish-deputeti demokrat thotë se pamjet nga videoja që shpërndau ministrja tregojnë se serumet jepen në shishe uji.
“Dorëheqja e Ogerta Manstirliut është më e pakta! SPAK të nisë hetimet për terrorizimin e qytetarëve me video të rreme. Ministrja e Shëndetësisë duhet te japë dorëheqjen!
Ajo ka mashtruar qytetarët përmes pamjeve të rreme, duke i terrorizuar ata. Efekti nuk është aspak sensibilizimi i qytetarëve për të përdorur maskën dhe masat e tjera për distancim social dhe higjenë.
Denoncimin e një qytetari tek JOQ ma kanë dërguar me dhjetëra të njohur, të revoltuar nga horrorri që Ministrja e Shëndetësisë përcjell me dashje. Qytetari ka njohur në video gjyshen e tij, të painfektuar nga COVID, që sot e ka në shtëpi, por që Ogerta Manastirliu e paraqet si të shtruar në spitalin COVID.
Ogerta Manastirliu duhet të japë dorëheqjen, sepse në vend të mesazheve bashkëpunuese, edukative për qytetarët, mbjell frikë dhe terror me regjinë e rreme makabre të Edi Ramës.
Qytetarë! Kujdesuni për veten! Është e vetmja mënyrë që të mos përfundoni tek spitali Infektiv, ku kushtet e pacientëve me COVID 19 janë skandaloze, siç kemi parë me në pak foto dhe video klandestine, pasi të sëmurët trajtohen si të burgosur pa asnjë të drejtë kontakti me jashtë, vetëm për të mos treguar të vërtetën e dështimit të Ogerta Manastirliut dhe Edi Ramës me krizën COVID 19 dhe me shëndetësinë në këto 7 vjet.
Shikoni edhe një herë videon e qeverisë. Pamjet tregojnë se serumet jepen në shishe uji. Në këtë nivel të tmerrshëm ka mbërritur shëndetësia falas, që premtoi Edi Rama 7 vjet e gjysëm më parë.
Prokuroria e Posaçme duhet të nisë menjeherë hetimin penal për Ministren e Shëndetësisë, që shpërndau një video false për të terrorizuar qytetarët! Në gati 108 vjet shtet, shqiptarët nuk kanë patur kurrë një qeveri kaq armiqësore ndaj tyre sa modeli që solli Edi Rama. Një qeveri që i vjedh, i varfëron, i mashtron dhe i terrorizon” mbyllet deklarata e PD-së.
