Bashkimi Evropian po paralajmëron qeveritë që të mos heqin karantinën 14-ditore për njerëzit e infektuar me COVID-19 pasi disa zhvillojnë infeksionin edhe pas dy javësh, tha kreu i agjencisë shëndetësore të bllokut, duke sinjalizuar një rritje të re të rasteve në Evropë.
Gjermania, vendi më i madh i BE, informoi autoritetet e BE se kishte në plan të shkurtonte gjatësinë e karantinës, pas lëvizjeve të ngjashme nga Hollanda dhe Norvegjia.
“Ne po kërkojmë të sigurojmë disa prova për vendimmarrësit se çfarë lloj rreziqesh ata do të ndërmerrnin nëse karantina do të ishte më e shkurtër,” u tha Andrea Ammon, kryetarja e Qendrës Evropiane për Parandalimin dhe Kontrollin e Sëmundjeve (ECDC), në një seancë të rregullt dëgjimore.
Ajo paralajmëroi që në 3-4% të rasteve, infeksionet shfaqen vetëm pas 14 ditësh, aq sa është gjatësia standarde e karantinës COVID-19.
“Virusi nuk ka fjetur gjatë verës. Nuk bëri pushime,” u tha Ammon ligjvënësve.
Ajo tha se të dhënat e kësaj jave treguan se në të gjithë Evropën kishte 46 raste për 100,000 njerëz. “Ne jemi pothuajse përsëri në numra që kemi parë në mars”, tha Ammon, duke iu referuar fillimit të fazës së pikut në Evropë.
Infeksionet në Mars në Evropë filluan të rriteshin në mënyrë të qëndrueshme në rreth 40 për 100,000 njerëz në fund të Marsit, sipas të dhënave të ECDC, dhe u rritën në rreth 70 për 100,000 deri në fund të Prillit.
Rritja aktuale e rasteve ishte pjesërisht për shkak të më shumë testimeve.
Rastet e reja gjithashtu kanë të bëjnë kryesisht me të rinjtë, tha ajo.
Sidoqoftë, Ammon tha se shtrimet në spital tani po rriteshin përsëri, duke sinjalizuar rritje në raste edhe tek të moshuarit.
Të dhënat, të cilat janë marrë nga 27 vendet e BE, Britaninë, Norvegjinë, Islandën dhe Lihtenshtajnin, variojnë midis shteteve nga 2 në 176 për 100,000 njerëz, tha Ammon pa cituar vende të veçanta.
