Bordi i Transparencës ka vendosur rritjen sërish të çmimit të naftës. Duke nisur nga ora 18.00 e ditës së djeshme çmimi i shitjes me pakicë i naftës do të jetë 258 lekë/litri, i shitjes me shumicë 246 lekë/litër, ndërsa rrezikon të shkojë 3 mijë lekë litri.
Ndërkohë, çmimi i shitjes me pakicë i benzinës do të jetë 243 lekë/litër dhe i shitjes me shumicë 231 lekë/litër. Kështu, sipas njoftimit të Bordit, bëhet m e dije se çmimi i shitjes me pakicë i gazit do të jetë 86 lekë/litër dhe i shitjes me shumicë 74 lekë/litër për automjetet. Çmimi i shitjes për gazin e lëngshëm të automjeteve do të jetë çmimi i furnizimit në stacionet e furnizimit në pikat e karburanteve, ndërkohë që në pikat e tjera për konsumatorët familjarë dhe industrial çmimi nuk duhet të përfshijë akcizën.
Për përcaktimin e çmimit final të karburanteve, Bordi ka si referencë çmimin e shpallur nga bursa në Platts i një dite më parë nga mbledhja, ndërsa më pas i shtohet një vlerë prej 20 USD/ton, taksat, tatimet, si dhe marzhi i fitimit për kompanitë e tregtimit me shumicë dhe ato me pakicë të karburanteve, që është respektivitisht 1% dhe 5%.
Sipas njoftimit të Bordit, çmimet reflektojnë ndryshimet që janë shfaqur në tregjet ndërkombëtare, por çdo operator ekonomik me shumicë dhe pakicë është i lirë t’i tregtojë këto nënprodukte me çmime më të ulëta se çmimet maksimale të miratuara.
Nafta në Shqipëri, ndër më të shtrenjtat në botë
Ndërkohë, ndër 170 shtete të botës, Shqipëria renditet në vendin e 147-ta sa i përket çmimit të naftës, çka e vendos ndër vendet e globit me naftën me pakicë më të shtrenjtë në absolut. Më saktësisht është vendi i 24- të me naftën më të shtrenjtë në botë për konsumatorin final.
Këto të dhëna dalin në pah nga përditësimi më i fundit i Global Petrol Prices, që i referohet datës 6 qershor. Pra, në këtë klasifikim nuk është i reflektuar çmimi më i ri i përcaktuar nga bordi i transparencës këtë të mërkurë, i fiksuar në 258 lekë për naftën.
Por, pavarësisht faktit se çmimi në këtë klasifikim i referohet një vlerë prej 10 lekësh më të lirë se çmimi i fiksuar këtë të mërkurën për naftën, Shqipëria rezulton të ketë një naftë më të shtrenjtë se vende si: Luksemburgu, Italia, Irlanda, Austria, Gjermania, Zelanda e re, Kroacia, Republika Çeke, San Marino, Kanadaja, Polonia, etj, etj. Krahasuar me vendet e rajonit të renditura nga Global Petrol Prices s’ka asnjë diskutim që Shqipëria qëndron në krye sa i përket naftës më të shtrenjtë për konsumatorin final.
Ndërkohë, me diferenca të vogla, çmimet e naftës në vendin tonë në datë 6 qershor ishin në nivele të përafërta, me vende si Izraeli, Mbretëria e Bashkuar, Spanja, Portugalia, Zvicra, Belgjika apo Franca. Siç e përmendëm më lartë, nafta në Shqipëri është më e shtrenjtë se në Luksemburg, ku paga mesatare bruto është 11 herë më e lartë se në Shqipëri;
më e shtrenjtë se në Austri, ku paga mesatare është 9.8 herë më e lartë se në Shqipëri; më e shtrenjtë se në Gjermani, ku paga mesatare është 9 herë më e lartë se në vendin tonë.
