Arjan Çani ka folur për jetën e tij dhe arsyet pse vendosi të bëhej gazetar.
I ftuar në emisionin “Të Paekspozuarit” në MCN TV, Çani tha se i propozuan të bëhej doganier, por nuk pranoi sepse kishte pasion gjuhën dhe ndoqi pasionin duke u bërë gazetar, fillimisht në disa gazeta, më pas në radio dhe në televizion dhe sot vijon të drejtojë emisionin “Zonë e Lirë”.
Pjesë nga biseda:
Ylli Rakipi: Përse vendose të bëhesh gazetar? Cfarë të tërhoqi?
Arjan Çani: Derisa mbarova shkollën e lartë për frengjisht, gjëja e parë që doja është të mësoja gjuhën në Francë, të mësoja zhargonin, që nuk mësohet në shkollë. Atje e kuptova, që nëse kisha një pasion, pasioni ka qenë gjuha. Unë gjuhën, fjalët i kam dashuruar dhe këtë e kam kuptuar vonë. Pra, doja thjesht të flisja, kam qenë llapaqen i paparë që i vogël.
Vajtja ime në Francë në ato vite, kur të gjithë e kishin të vështirë të shkonin….
Ylli Rakipi: Ishe në Francë për bukuri. Pse u ktheve?
Arjan Çani: Vonë e kam kuptuar, se njerëzit pak a shumë janë njëlloj, kanë të njëjtat nevoja, ndahen te detajet, atje ku diferencohen me njëri tjetrin. Kur mbarova shkollën, kisha dy verisone, ose do ikja në Francë, për të ndjekur pasionin e gjuhës, të jetoja të bëja aventura, ose të futesha doganier, ku bëhej para pafund.
Ylli Rakipi: Si tu mbush mendja ty të bëhesh gazetar dhe jo doganier?
Arjan Çani: Unë thashë jo pra. Më thuaj ti pse thashë jo?
Ylli Rakipi: Ti tani mund të ishe ministër i Financave…
Arjan Çani: Mund të isha me më shumë para.
Ylli Rakipi: Mund të kishe rënë edhe në burg. Nejse, pastaj fillove te gazeta Koha Jonë me Nikoll Lesin?
Arjan Çani: Po dhe dua ta falenderoj Nikollën, sepse ishte njeri shumë i hapur atëherë. U bë komunitet i madh atje.
