Një 30-vjeçar me iniciale D.T. është arrestuar nga policia e Tiranës pasi një ditë më parë në rrugën e Bogdanëve rrahu me grushte dy vajza Mirela dhe Albina Ruko, pa asnjë arsye teksa ato po ecin në trotuar
Video u publikua në rrjetet sociale, ndërsa mësohet se ky ishte një rast i përsëritur i dhunës që 30-vjeçari shkaktonte ndaj vajzave në rrugë veçanërisht në zonën e Myslym Shyrit.
Materialet i kaluan Prokurorisë pranë Gjykatës së Shkallës së Parë Tiranë, për veprime të mëtejshme procedurale.
Njoftimi i policisë
Specialistët për Hetimin e Krimeve në Komisariatin e Policisë Nr. 3 bënë arrestimin në flagrancë të shtetasit:
– D. T., 30 vjeç, banues në Tiranë, për veprën penale “Plagosja e lehtë me dashje”.
Arrestimi i tij u bë pasi gjatë ditës se djeshme kanë bërë kallëzim shtetaset A. R., 26 vjeçe dhe M. R., 29 vjeçe, banuese të dyja në Rrugën e Bogdanëve, se një shtetas i ka goditur me grushte pa arsye po në këtë rrugë, rast i cili është bërë publik dhe në rrjete sociale.
Pas denoncimit, shërbimet e Policisë kanë ndërhyrë menjëherë duke shoqëruar në ambientet e Policisë shtetasin D. T., ku në përfundim të veprimeve u bë dhe arrestimi i tij.
Materialet i kaluan Prokurorisë pranë Gjykatës së Shkallës së Parë Tiranë, për veprime të mëtejshme procedurale.
Vetë vajzat kanë bërë një reagim në rrjetet sociale duke denoncuar dhunën ndërsa thonë se pasi janë sulmuar për herë të parë, janë drejtuar për në komisariat për të denoncuar por i riu u ka bërë pritë për herë të dytë.
“Sot rreth orës 13:00, një person i panjohur më sulmoi pa arsye mua dhe motrën time. Ne dolëm për të bërë pazar dhe përfunduam të dhunuara në mes të ditës, në një nga rrugët më të frekuentuara në kryeqytet.
Të nisura drejt komisariatit, personi na bëri sërish pritë dhe na sulmoi për të dytën herë. Sipas policisë, nuk është hera e parë që e bën këtë gjë. Denisi ka 8 kallëzime në polici për dhunë në rrugë ndaj personave të panjohur(kryesisht vajzave). Kallëzimi im dhe i motrës time është i 9! Kush e di sa e sa raste të paraportuara. Ama ndaj Denisit nuk ka asnjë rast hetimor të hapur e aq më pak të jetë i dënuar.
Si duket, Denisi ka miqësi të fortë dhe vazhdon palestrohet për të rrahur kë ti dalë përpara! Fajtori këtu është shteti që lë të lirë një njeri i cili dukshëm ka probleme të shëndetit mendor.
Shteti nuk të fal as për një grafiti në rrugë, as nëse e ngre zërin në protestë, por rastet si ky i kalon në heshtje e me prapaskena siç është mësuar zakonisht të bëj. Kësaj radhe as prokuroria dhe as Denisi nuk do ja hedh lehtë! Jo vetëm për vete, por për të gjitha ato vajza që ai ka dhunuar!”, thuhet në postimin e vajzave.
Ndërkohë Organizata Politike ku dy të rejat janë aktiviste ka postuar fotot e dëmtimeve që u janë shkaktuar në fytyrë për shkak të dhunës dhe foton e Denisit 30-vjeçar.
Sipas kësaj organizate ndaj Denisit ka të paktën 8 kallëzime në polici për dhunë ndaj vajzave por në të gjitha rastet ai është lënë i lirë.
Postimi i Organizatës Politike
Sot rreth orës 13:00 dy aktivistet e Organizatës Politike Albina Ruko dhe Mirela Ruko janë sulmuar dhe goditur fizikisht pranë vendbanimit të tyre. Pas denoncimit në polici, morëm vesh se keqbërësi, i quajtur Denis, është një personazh famëkeq, i njohur edhe nga policia si dhunues përsëritës i vajzave në rrugët e Tiranës. Ndaj këtij personi ka të paktën 8 kallëzime në polici për dhunë ndaj vajzave, por në të gjitha rastet institucionet ligjzbatuese e kanë lënë të lirë.
Përgjegjës për dhunën kafshërore ndaj shoqeve tona dhe vajzave të tjera nuk është vetëm ky keqbërës, por edhe i gjithë zinxhiri i institucioneve shtetërore që vazhdojnë të tolerojnë krime të tilla: nga policia te prokuroria dhe çdokush që ka në dorë të frenojë dhunën. Për këto institucione, jeta dhe siguria fizike e vajzave janë të parëndësishme.
Edhe sa vajza duhet të dhunohen përpara se shteti të veprojë?! Mos duhet të presim që grushtet keqbërëse të marrin jetë?! Apo ta marrim vetë drejtësinë në dorë?!
Dhuna dhe indiferenca e institucioneve shtetërore na motivojnë edhe më shumë për të luftuar kundër dhunës gjinore dhe diskriminimit të shumanshëm të vajzave dhe grave.
