Stërvitja “Rreth – Grethi 2018”, e zhvilluar nga Batalioni i Tretë i Këmbësorisë i Forcës Tokësore (b3kFT), në rajonin e stërvitor të Rreth – Grethit, Kavajë, pati si vizitorë të shquar ditën e sotme shefin e Shtabit të Përgjithshëm të Forcave të Armatosura gjeneral brigade Bardhyl Kollçaku, i cili shoqërohej nga komandanti i Forcës Tokësore gjeneralmajor Nazmi Cahani.
Shefi i Shtabit të Përgjithshëm të Forcave të Armatosura gjeneral brigade Bardhyl Kollçaku, në përshëndetjen e tij drejtuar trupave pjesëmarrës në këtë stërvitje, adresoi një falënderim të veçantë për të gjithë pjesëmarrësit deri tek ushtari i fundit për kontributin, disiplinën dhe profesionalizmin e treguar në këtë stërvitje, për masat e marra për zhvillimin sa më normal të saj.
“Stërvitja e kompaktësimit, është një konkludim i stërvitjeve dhe trajnimeve vjetore, por edhe kontroll i aftësive profesionale individuale, të cilat ju i demonstruat sot në mënyrën më të shkëlqyer të mundshme. Pata rastin që nëpërmjet demonstrimeve të kryera nga ana juaj, të shikoj me krenari se ju veproni si një ekip. Shpirti i kohezionit të grupit dhe vendosmëria në realizimin në mënyrën më profesionale të mundshme të detyrës së marrë, u manifestuan në mënyrë të përkryer nga të gjithë ju sot në të gjitha stacionet stërvitore. Stërvituni çdo ditë me pasion, stërvituni çdo ditë duke qenë kërkues ndaj vetes në çdo moment. Realizoni çdo detyrë me përgjegjësi, duke pasur gjithmonë në mendjen dhe zemrën tuaj idealin më të lartë për çdo ushtarak, shërbimin ndaj atdheut dhe ndaj flamurit ku të gjithë jemi betuar. Shtabi i Përgjithshëm i FARSH, do të jetë gjithmonë krah jush për t’iu asistuar në çdo nevojë që do të keni. Jemi krenarë për ju dhe për punën e mrekullueshme që bëni çdo ditë, në shërbim të Atdheut…” – u shpreh ndër të tjera gjeneral Kollçaku.
Stërvitja “Rreth – Grethi 2018”, u zhvillua në katër faza dhe objektiv të saj kishte rritjen e nivelit operacional duke u fokusuar në përgatitjen e shtabit dhe nënreparteve me qëllim krijimin e kapaciteteve për realizimin e misionit për kryerjen e detyrave në operacione të mbështetjes së paqes.
