BE tani po mat situatën nëse do t’i ndalojë udhëtarët amerikanë të hyjnë në Europë për shkak të agresivitetit të Covid-19 në Shtetet e Bashkuara ditët e fundit, citon Lajmi i Fundit.al.
Zyrtarët e Bashkimit Europian janë në proces të hartimit të listave për të përcaktuar se kush mund të hyjë në bllok që nga 1 korriku bazuar në mënyrën se si vendet po e menaxhojnë rastet e tyre aktuale me COVID-19, raporton New York Times.
Sipas një draft liste, amerikanët do të ndalohen të hyjnë në BE sepse SH.B.A. nuk ka arritur të kontrollojë pandeminë COVID-19.
Shtetet e Bashkuara, të cilat kanë rastet më të shumta me koronavirus në botë dhe po përjetojnë një rritje të infeksioneve të reja, do të përfshihen në të njëjtën kategori si pikat e nxehta, Brazili dhe Rusia, përcjell Lajmi i Fundit.al.
Deri më tani nuk ka asnjë reagim nga Shtëpia e Bardhë për këtë masë të BE-së.
Infektimet me Covid-19 në të gjithë SHBA tani kanë tejkaluar 2.3 milion dhe më shumë se 120,000 amerikanë kanë vdekur.
Brazili aktualisht ka 1.1 milion infeksione dhe Rusia pason me afro 600,000 raste. Mbretëria e Bashkuar aktualisht ka 307,000 raste, Spanja ka 246,000 dhe Italia 238,000.
Një diplomat i BE tha se Komisioni Ekzekutiv i bllokut kishte propozuar tre kritere për lejimin e udhëtarëve nga këto vende, përfshirë situatën epidemiologjike të atij vendi.
Megjithatë, vendet anëtare të BE-së duhet të përcaktojnë cilat duhet të jenë matjet dhe pragjet përkatëse, transmeton Lajmi i Fundit.al.
Në fillim të këtij muaji, Komisioni Europian rekomandoi që blloku gradualisht të rihapë kufijtë e tij për udhëtarët nga korriku dhe të përdorë tre kritere për të vendosur se nga cilat vende do të lejohen vizitorët.
Kriteret përfshijnë vendet që e kanë COVID-19 nën kontrolli më shumë se mesatarja e BE-së.
Shtetet e BE-së do të diskutojnë mbi kriteret këtë të Mërkurë, megjithëse nuk ka asnjë garanci se do të merret një vendim i formës së prerë.
Në mars, kur rastet ishin në rritje në Evropë, Trump ndaloi shumicën e qytetarëve të BE-së të hynin në Shtetet e Bashkuara në një përpjekje për të frenuar shpërthimin atje, vendim që zemëroi jo pak zyrtarët e BE-së.
Ndërsa Shtetet e Bashkuara dukej se kishin frenuar shpërthimin për disa javë në maj, rastet e përgjithshme u rritën 25 përqind javën e kaluar, sipas një analize të Reuters.
Burimi: Daily Mail | Përktheu dhe përshtati Lajmi i Fundit.al
