Ambasada e SHBA-së në Tiranë njoftoi sot se “janë hapur aplikimet për vitin 2019 për Programin Veror Transatlantik Benjamin Franklin”.
Ambasada njofton se gjithë të interesuarit mund të dërgojnë aplikimin e plotë në adresën e-mail( CultureandEducationTirana@state.gov) të Ambasadës amerikane në Tiranë, deri më 16 dhjetor 2018.
Programi Veror Transatlantik Benjamin Franklin 2019 do të zgjasë 4 javë, qershor – korrik 2019 në Universitetin Purdue në West Lafayette, Indiana.
Qëllimet e këtij instituti janë rritja e përkushtimit në bashkëpunimin transatlantik, nxitja e
marrëdhënieve të të rinjve me etni të ndryshme, mes Amerikës dhe Europës, si dhe promovimi i marrëveshjes dypalëshe mes Amerikës dhe Europës.
Po ashtu synohet të zhvillohet një kuadër udhëheqësish të rinj të cilët do t’i ndajnë njohuritë dhe aftësitë me bashkëmoshatarët e tyre mes shembujve pozitivë.
Programi 4-javor do të akomodojë 55 kandidatë nga mosha 16-18 vjeç. Ky program do të mirëpresë 45 studentë europianë dhe 10 amerikanë. Aktivitetet e këtij programi përfshijnë diskutime për çështje globale me interes të përbashkët, trajnime mbi lidershipin dhe median, zhvillimin e bashkëpunimit për projekte, shërbim komunitar, udhëtime mësimore, dhe planifikim për projektet në vazhdim. /atsh
