Ndërsa Europa po pret me padurim vaksinën teksa po preket nga e ashtuquajtura ‘Vala e Dytë Covid’, një lajm jo optimist vjen nga OBSH-ja, sipas së cilës koronavirusi ka ardhur për të qëndruar mes nesh.
Dr. David Nabarro, autoritet i OBSH-së për pandeminë u shpreh se “Ky virus nuk do të zhduket. Ai ka ardhur këtu për të qëndruar, do të jetë një kërcënim i ri për njerëzimin”.
Sipas tij, edhe “kur të kemi në dispozicion vaksinën, nuk do të thotë se ka ardhur fundi i virusit vrastar. Do të kemi një mjet më tepër për ta luftuar por vetëm kaq. Në thelb, tani e tutje ne duhet të menaxhojmë jetën tonë në mënyrë që të parandalojmë që ky virus të na infektojë”.
Ndërkohë Mbretëria e Bashkuar e ka konfirmuar veten si vendi evropian me numrin më të lartë të viktimave kurse Amerika e Jugut është kontinenti më i prekur nga Covid-19.
33.8% e mbi një milion viktimave të deritanishme (dhe 33.27% e rasteve totale) janë regjistruar në Amerikën Latine, ku ka pesë vende midis dhjetë më të infektuarve në botë- Brazili, Kolumbia, Peruja, Meksika dhe Argjentina. Në total në jugun e Amerikës ka 338.611 vdekje dhe 9.2 milion raste të konfirmuara.
Sakrificat e të rinjve evropianë
Presidenti francez, Emmanuel Macron, duke përmendur rastin e mbylljes së lokaleve në Masiglia, tha se “Asnjëherë më parë nuk janë kërkuar kaq shumë sakrifica nga të rinjtë evropianë sesa në këtë periudhë të krizës shëndetësore, duke kërkuar gjithashtu një përgjegjësi e jashtëzakonshme për të ardhmen, për çështjet mjedisore, diplomatike dhe financiare”.
