Krimi horror i ndodhur në fshatin Gjerpës të Mallakastrës, ku Drita Saliaj, u mbyt me peshqir dhe më pas u hodh në ujërat e rezervuarit të Lumarës, kalon çdo limit të vrasjes të një jete njeriu.
Drita Saliaj, jetonte e vetme në banesën e saj, ndërkohë që në mesnatën e 5 janarit 2020 është sulmuar, dhe më pas vrarë nga tre persona që, për policinë dhe prokurorinë e Fierit, janë L.Saliaj, nipi i burrit të viktimës dhe dy shokët e tij S.Shehaj e Ervis Zotaj.
Trupi i pajetë i Drita Saliaj, u gjet nga polumbarët gjysmë i zhveshur, ndërkohë dy ditë pas kësaj ngjarje tejet të rëndë.
Së fundi është hedhur dritë mbi të gjithë dinamikën e këtij krimi të shëmtuar. Gjithçka është treguar nga goja e protagonistit të këtij krimi, 16-vjeçarit L.Saliaj, ku siç rrëfen ai, dy shokët e tij i Ervisi dhe S.Shehaj, i kishin thënë: ‘…do të ikim të marrim hashashin në shtëpinë e Dritës, gruas së Hair Saliaj…’.
16-vjeçari tregon se nuk, ka hyrë në banesë por ka qëndruar jashtë shtëpisë së Dritës, dhe pas 30 minuta ka parë se Ervisi dhe S.Shehaj i kanë dalë jashtë, ku në duar mbanin trupin e pajetë të Dritës, duke i kërkuar ndihmë që ta fusnin në makinë.
I mituri ka pohuar në polici, se nuk ka asnjë lidhje me krimin e rëndë, dhe se para se të ndodhte ngjarja, ai ishte në shtëpinë e gjyshit të tij në një fshat tjetër. Me S.Shehaj dhe Ervisin, ishin takuar në autostradë dhe pasi e kanë marrë në makinë, sipas tij ata i kanë propozuar për të shkuar në mesnatë në shtëpinë e Drita Saliaj.
Por ajo që ngreh shumë pikëpyetje për grupin e hetimit është fakti se në banesën e familjes së L.Saliaj që ndodhet 30 metra larg asaj të viktimës, gjatë këqyrjes së saj, mbi tavolinë janë gjetur 4 pjata me përmbajtje ushqimi dhe një gotë ujë, gjë e cila ka ngritur dyshime të forta se tre autorët kanë qënë bashkë dhe kanë hartuar një plan konkret.
Në vijim të hetimeve të kësaj vrasje tronditëse, prokuroria e Fierit, ka urdhëruar arrestimin e tre personave L.Saliaj, S. Shehaj dhe Ervis Zotaj, duke ngritur ndaj tyre akuzën e ‘Vrasjes me paramendim e shoqëruar kjo me torturë, kryer në bashkëpunim dhe ‘Asgjësimin e kufomës’. Gjithashtu në banesat e Shehaj dhe Zotaj janë sekuestruar dy armë gjahu, çifte. Pritet që nesër tre autorët të dalin para gjykatës së Fierit, për tu njohur me masën e sigurisë ‘arrest në burg’ që ka kërkuar prokuroria.
Rrëfimi i të riut në polici
Rezulton se në orët e mbrëmjes së 6 janarit 2020, në ambientet e komisariatit Mallakastër janë paraqitur, M.Saliaj, së bashku me djalin e saj L.Saliaj 16-vjeç, të dy me banim në fshatin, Gjerpës Mallakastër. Nënë e bir, kanë denoncuar zhdukjen e të afërmes së tyre, Drita Saliaj, gruaja e xhaxhait të 16 vjeçarit.
Sipas rrëfimit të nënë e bir në polici, Drita Saliaj, jetonte e vetme, pasi të shoqin dhe fëmijët i kishte jashtë shtetit në emigracion dhe për këtë zhdukje, akuzonin, Ervis Zotaj, nga fshati Gjerpës dhe S.Shehaj nga fshati Çerrile. Vetë L.Saliaj ka treguar para policëve detaje nga ky krim i rëndë, detaje që më pas kanë ndryshuar pozicion e tij në këtë çështje, ku nga dëshmitar ai është marë në përgjegjësi penale.
Më tej 16-vjeçari ka treguar si më poshtë:’…kam dalë nga shtëpia e gjyshit dhe kam shkuar në në autostradë, ku kam pritur në këmbë, derisa aty erdhi S. Shehaj, me automjetin e tij, ku me vete kishte marrë edhe Ervisin. Hipa në makinën e S.Shehaj dhe Ervisi, i cili ishte pasagjer në vendin e parë të makinës, dhe më tha që ‘…do të ikim të marrim hashash në shtëpinë e Dritës, gruas së Hair Saliaj…’. Sqaroj se Drita Saliaj është gegeja ime, pasi i shoqi i saj Hair Saliaj është kushëri i parë me babanë tim.
Më tej në rëfimin para oficerëve dhe një prokurori të seksionit të të miturve në prokurorinë e Fierit, L.Saliaj, ka treguar se si më poshtë: ‘unë i thashë, S. Shehaj dhe Ervisit, mua mos më ngatërroni me këto gjëra, por Ervisi më qëlloi me pëllëmbë në fytyrë duke më sharë ‘…mbylle gojën se të q… robt…’. Kur erdhëm në fshatin Gjerpës, rreth orës 00:30 të datës 5 janar 2020, u afruam te shtëpia e Dritës, duke i rënë nga rruga prapa shtëpisë së saj, ku mua më lanë te puseta që ndodhet 20 metra pas shtëpisë së Dritës, ndërsa vetë S.Shehaj me Ervisin, e kanë lënë makinën e tyre te porta e vogël, pas shtëpisë së saj.
Ervisi me S.Shehaj kanë hyrë në avllinë e shtëpisë së Dritës, dhe kanë trokitur te dera e shtëpisë, ku unë pashë dhe dëgjova që Ervisi i ra derës dhe i tha nga jashtë:’…Drita jam unë, Visi…’. Drita më pas ka hapur derën nga brenda shtëpisë së saj dhe ata të dy kanë hyrë brenda, ku kanë qëndruar afro gjysmë ore në shtëpi. Më pas, kam parë që Ervisi me S.Shehaj, e kanë nxjerrë Dritën të lidhur nga duart prapa dhe këmbët me spango. Unë, pasi i pashë se çfarë po bënin Ervisi me S.Shehaj , u kam folur nga puseta ku isha: ‘…Çfarë po bëni kështu…’, por Ervisi më tha:’…hajde këtu poshtë…’.
Unë kam vajtur te vendi ku ishte makina e tyre dhe në kohën që po fusnin Dritën, të lidhur brenda në makinë, u them edhe një herë: ‘…Çfarë po bëni ore, çfarë bëni….?’, por Ervisi më godet me shqelm duke më rrëzuar përtokë dhe duke më sharë më thotë fjalët: ‘…do ta vrasim, prandaj mbyll gojën të q… robt dhe dil me vrap te kodra sipër….’.
Në atë moment, që ata po fusnin Dritën brenda në makinë, pashë që Drita kishte të veshur një bluzë si të kuqe dhe pantallona me ngjyrë të zezë. Pasi e futën Dritën të lidhur në sediljen e pasme të makinës së S.Shehaj, ai u ul në sediljen e shoferit, ndërsa Ervisi u ul në sediljen e parë të pasagjerit dhe u larguan me automjetin e tyre në drejtim të liqenit të Çerjes.
S’qaroj se liqeni i Çerjes ndodhet pas liqenit të Lumare 1 dhe Lumare 2, dhe unë i pashë që po shkonin në drejtimin e lartpërmendur nëpërmjet dritave të makinës së S.Shehaj . Më pas, unë jam larguar i vetëm në këmbë në drejtim të Povlës dhe pas afro një orë, S.Sheaj me Ervisin më gjetën në rrugë duke ecur te benzinata në Povël dhe më kanë kërkuar që të hipja në makinën e tyre.
Më pas më kanë çuar te lokali 24-orësh në Poçem, ku edhe më kanë zbritur. Kur më zbritën, Ervisi më tha fjalët: ‘…mos më dil më përpara syve…’ dhe së bashku me S.Shehaj, u larguan për në drejtim të rrugës së Hekalit, që shkon për në Ballsh. Unë më pas kam pirë i vetëm kafe te lokali 24-orësh në Poçem dhe rreth orës 05:30 ka ardhur përsëri S.Shehaj me automjetin e tij te lokali 24-orësh në Poçem. Kam hipur në makinën e tij.
Në atë moment, S.Shehaj më tha që ‘…Ervisin e lashë në Hekal…’, pasi atje kishte lënë makinën e tij. Më pas S.Shehaj i më çoi te shtëpia e gjyshit tim në Roms dhe pas kësaj, ai u largua. Që nga ai moment që S.Shehaj më çoi te shtëpia e gjyshit e deri ditën e sotme, unë nuk jam takuar dhe nuk kam komunikuar as me S.Shehaj dhe as me Ervisin.
Në mbrëmjen e datës 6 janar 2020, unë i kam thënë nënës sime , se çfarë kishte ndodhur me Dritën dhe pas kësaj, nëna komunikoi me xhaxhanë tim R.Saliaj që jeton në Fier dhe të tre më pas kemi vajtur për të informuar për ngjarjen e ndodhur te Komisariati i Policisë Mallakastër’.
Hetimet e policisë për gjetjen e prova dhe dy autorët
Sapo policia, ka marrë këtë informacion të detajuar mbi autorët e dyshuar të kësaj zhdukje, një grup oficerësh kanë shkuar në banesën e dy personave S.Shehaj dhe Ervis Zotaj. Njëherësh është shkuar dhe në banesën e Drita Saliaj, ku u konstatua shtëpia ishte një njëkatëshe. Nga verifikimet e mëtejshme, të kësaj shtëpie u gjetën sende dhe rroba të përmbysura dhe të hedhura përtokë në mënyrë të çrregullt, te lavamani u sekuestruan 2 filxhanë kafeje, 1 gotë uji e gjetur mbi tavolinë,1 aparat telefoni celular në gjendje të fikur.
Ndërkohë mbi divanin e njërës nga dhomat e banesës, është fiksuar dhe marë si provë materiale për ekspertim të mëtejshëm laboratorik një çantë e vogël dore grash, me material lëkure, me ngjyrë kafe. Gjithashtu në dysheme, në pjesën e jashtme të verandës së banesës, në afërsi të derës së kësaj banese, u fiksua një njollë gjaku.
Njëherësh kontroll është kryere dhe në banesën e vetë 16-vjeçarit L.Saliaj, që tregoi së bashku me nënën e tij zhdukjen e Drita Saliaj. Banesa e 16-vjeçarit ndodhet 30 metra larg, shtëpisë së viktimës dhe pikërisht në këtë banesë, u gjetën mbi tavolinë 4 pjata me ushqimi si dhe një gotë ujë.
Gjetja e trupi të pajetë në ujin e Rezervuarit
Gjatë hetimeve të kryera është arritur të merret informacion se në rezervuarin ‘Lumare 1’, ishte hedhur trupi i pajetë i Drita Saliaj.
Nga polumbarët, rreth orës 16:00, është bërë gjetja dhe nxjerrja e trupit të pajetë të, Drita Saliaj, e cila kishte të veshur një bluzë me ngjyrë të kuqe dhe te beli kishte një pulovër me ngjyrë si bojëqielli, kurse në pjesën e poshtme ishte e zhveshur. Duart i kishte të lidhura nga prapa me një shall nejloni, ndërsa këmbët i kishte të lidhura me një litar, ndërsa në qafë kishte të lidhur një peshqir.
/Publikuar nga Shqiptarja
