Sekretari i Përgjithshëm i PD-së, Gazment Bardhi ka sfiduar gazetaren Mirela Milori duke i kërkuar që të përmendë vetëm një fjali të Astrit Patozit kundër Edi Ramës, meqënëse gazetarja ngulmoi se “është krijuar një parti e re e spektrit opozitar”.
Debati u zhvillua në studion e Abc News mbrëmjen e sotme, ku Bardhi ishte ftuar për të folur për marrëveshjen e opozitës së bashkuar por edhe për nismën e Astrit Patozit për të krijuar partinë e re “Bindja Demokratike”.
Pjesë nga intervista e Gazment Bardhit
Gazment Bardhi: PD është e vendosur për të pamundësuar zgjedhje false në Shqipëri. Mesa duket, zoti Patozi ka vendosur që t’i shërbejë të kundërtës, pra të jetë pjesë e zgjedhjeve false dhe farsë në Shqipëri. Është zgjedhja e tij, shqiptarët dinë të gjykojnë.
Ditën e djeshme është krijuar “Bindja Demokratike”, një forcë e re opozitare, e cila ka deklaruar pjesëmarrjen në zgjedhje.
Gazment Bardhi: Unë e shpreha qëndrimin tim, por që të quhesh opozitare duhet të kesh aktivitet që të konsiderohesh opozitare. Ju nuk mund të thoni që “është krijuar një parti, e cila nuk është krijuar ende dhe kjo është opozitare”. Pasi të kesh krijuar partinë, gjatë qendrimeve që mban në aktivitetin tënd politik, identifikohesh si opozitare apo qeveritare. Zoti Patozi ishte në studion tuaj dhe po të më thoni apo të mbani mend ndonjë fjali që tha kundër Edi Ramës, ju lutem, ma kujtoni. Ma thoni? Në 30 minuta në intervistën tuaj, foli vetëm kundër PD, nuk foli kundër Edi Ramës. Prandaj, duhet të jemi të sinqertë me shqiptarët. Opozitar të bën vetëm veprimtaria politike. Sa për pjesëmarrjen në zgjedhje, në përputhje më kushtetutën dhe ligjin, kjo parti nuk merr dot pjesë në zgjedhje, sepse nuk është rregjistruar akoma në gjykatë, ndërkohë, që afati i rregjistrimit të partive politike për të marrë pjesë në zgjedhje ka përfunduar dje. Nëse Edi Rama, për interesat e veta, do të urdhërojë politikisht anëtarët e vet në KQZ që të shkelin ligjin për ta regjistruar këtë parti, besoj se ua qartëson shpejt shqiptarëve nevojën për krijimin e kësaj partie.
Mendoni që do të marë elektorat nga PD?
Gazment Bardhi: Asnjë rrudhje të PD nuk ka për të patur. Të jeni të sigurt se, siç kemi rritje gjatë këtyre muajve të fundit, rritja e pandalshme e PD do të vijojë. Ju ftoj të kërkoni, statutin, nismëtarët, firmëtarët e kësaj partie për të parë edhe se kush ka firmosur për krijimin e kësaj partie dhe për të qartësuar publikun.
Milori: Të mos përsërim përgjigjet…
Gazment Bardhi: Do të duhet të jemi të sinqertë me shqiptarët, sepse i vendosim epitetin dhe pastaj e zhvillojmë debatin sipas epiteteve që nuk qëndrojnë.
Pyetjet i bëj unë dhe i kemi ndarë rolet. Prania e një partie tjetër opozitare në zgjedhjet e 30 qershorit, e dëmton PD dhe kauzën tuaj?
Gazment Bardhi: Cila është partia opozitare ju lutem, se unë nuk njoh ndonjë parti opozitare që të jetë regjistruar në zgjedhje. Dhe po e përsëris, partia nuk është regjistruar akoma dhe nuk merr dot pjesë në zgjedhje ligjërisht. E vetmja mundësi për të marrë pjesë në zgjedhje është ndihma e Edi Rama. Nuk e di nëse janë të gatshëm themeluesit, që të pranojnë tani ndihmën e Edi Ramës.
