“Sipas parashikimeve të Shërbimit Meteorologjik Ushtarak dhe IGJEUM për shkak të reshjeve të dëborës dhe temperaturave të ulëta, të cilat priten të fillojnë në orët e vona të ditës së sotme e që do të vazhdojnë deri më datën 10 janar, me pasojë ngricash të forta edhe në datat 11 e 12 janar, qarku ynë do të përballet me situata të pazakonta sidomos për qarkullimin e mjeteve, lëvizjen e qytetarëve, furnizimin me ujë, ngrohjen dhe problematika të tjera”, bën të ditur Prefektura e Gjirokastrës.
Nga informacionet e marra aktualisht, Prefektura sqaron se në bashkinë Përmet, rrugët e fshatrave Vërçisht, Miçan, Zavalan, Ogren në Njësinë Administrative Frashër për shkak të ngricave, mjetet qarkullojnë me vështirësi dhe vetëm me zinxhirë.
“Në bashkinë Këlcyrë, rrugët e zonës së Malëshovës (Malëshovë, Limar, Leskaj) qarkullimi bëhet vetëm me zinxhirë. Në bashkinë Tepelenë, rruga Tepelenë – Kurvelesh në Njësinë Administrative Kurvelesh e kalueshme vetëm me zinxhirë në segmente të veçantë si dhe rruga e fshatit Salari për dy lagje është në të njëjtën gjendje”, shprehet Prefektura.
Sipas njoftimit të Prefekturës në bashkinë Gjirokastër, Memaliaj, Libohovë dhe Dropull situata është e qetë, nuk raportohen probleme, ndërsa në aksin rrugor Erind – Çajup qarkullimi i mjeteve bëhet me zinxhirë. /atsh
