Një urim për mësuesit në festën e 7-marsit ka ardhur edhe nga kryetarja e LSI-së, Monika Kryemadhi. Përmes një postimi në Facebook, Kryemadhi është shprehur se gjithmonë do mbetet nxënëse para mësuesve, ndërsa i falenderon.
“Mbetemi gjithmonë nxënës…! Jemi gjithmonë nxënës, ndaj dhe në 7 Mars nuk mund të harrojmë kurrë se kush kanë qenë ata, që na mësuan, na futën në botën e madhe të librit, të dijes dhe të edukatës së mirë.
Mirënjohja është gjithmonë një fjalë e pamjaftueshme për të përmbledhur atë gjithçka të madhe, që mësuesit bënë me ne.
Misionarët e të mirës, që kanë festën e tyre sot më 7 Mars, na mësuan të mbetemi nxënës përjetë, të jemi modest, të jemi të duruar siç kanë qenë ata të duruar me ne, për të na mësuar dhe për të kuptuar se të mësuarit nuk ndalet, siç nuk ndalet jeta. I përulem mësuesve të mi, i përulem misionit tuaj të shenjtë dhe mbetem gjithmonë nxënësja juaj”, shkruan Kryemadhi.
