Delegacioni i Parlamentit Europian, i cili vizitoi Shqipërinë, gjithashtu i bëri thirrje shumicës qeverisëse të fillonte bisedimet me opozitën për të zgjidhur krizën politike.
“Bojkotimi i përfaqësimit të popullit në parlament është një sinjal shumë i keq. Kjo do të minojë kredibilitetin e shtetit dhe të kombit në tërësi”, tha Tunne Kelam nga Estonia, kreu i delegacionit.
Shqipërisë, anëtare e NATO-s që nga viti 2009, iu dha statusi i kandidatit të BE në vitin 2014, ndërkohë që ajo shpreson të nisë negociatat e anëtarësimit në qershor.
Opozita e drejtuar nga Partia Demokratike, e qendrës së djathtë, pretendon se qeveria e majtë e kryeministrit Edi Rama është e korruptuar dhe ka lidhje me krimin e organizuar.
Ata duan që një administratë kujdestare për të zhvilluar zgjedhjet e parakohshme.
“Edhe nëse opozita ka plotësisht e drejtë për akuzat, bojkotimi i parlamentit nuk do t’i zgjidhë problemet e tyre”, tha Knut Fleckenstein, anëtari gjerman i delegacionit.
Duke udhëtuar në një qytet verior, drejtuesi i demokratëve, Lulzim Basha, nuk dukej i gatshëm që t’u kushtonte vëmendje thirrjeve të delegacionit.
Ai tha se opozita do të “ndërthurte protestat me mosbindje civile dhe me të gjitha aktet e tjera të revoltës dhe zemërimit civil”.
Protestat e opozitës në dy javët e fundit u shndërruan në të dhunshme, me përkrahësit që sulmuan policinë, që u kundërpërgjigj me gaz lotsjellës. Disa protestues dhe policë u plagosën.
Delegacioni i BE do të udhëtojë për në Maqedoninë e Veriut, e cila gjithashtu po kërkon të nisë negociatat e anëtarësimit këtë vit./ atsh/
