“Lumi Gjanica në Fier, po kthehet në një atraksion turistik, ndërsa projekti për rehabilitimin e këtij lumi konsiderohet si një pikë rëndese për Fierin”.
Kështu u shpreh Prefekti i Fierit, Baki Bala, i cili inspektori punimet që po kryhen për rehabilitimin e lumit Gjanica.
Bala tha se “projekti i qendrës së Fierit po vijon me intensitet të lartë”.
Duke iu referuar punimeve për rehabilitimin e lumit Gjanica, prefekti Bala tha se “për këtë projekt po punohet me tre turne”.
Punimet për këtë projekt po kryhen nga kontraktori Alb Star, një kompani lider jo vetëm në qark, por edhe më gjerë.
Deri tani, lumi Gjanica në Fier ka hyrë në shtratin e ri, në seksionin e parë të punimeve, ku është gërryer shtrati dhe janë betonuar skarpatet anësore.
Në fazën e parë të punimeve, shtrati i lumit Gjanica u devijua, për t’i hapur rrugën betonimit të skarpateve.
Rehabilitimi i lumit Gjanica në Fier, ka hyrë në një fazë intensive dhe puna po vazhdon të kryhet edhe gjatë natës për të fituar sa më shumë kohë dhe për t’i siguruar qytetit dhe qytetarëve një lumë të sistemuar dhe një qendër qyteti të transformuar, sa më shpejt të jetë e mundur.
Rehabilitimi i lumit Gjanica, që për çerekshekulli ishte kthyer në burim plehrash e përmbytjesh për qytetin e Fierit, mbetet projekti më madhor i zbatuar në këtë qytet.
Ndërtimet përgjatë skarpateve të lumit tashmë janë shembur, për t’i lënë rrugën zbatimit të projektit që do të ndryshojë dimensionin urbanistik të qytetit.
Projekti për rehabilitimin e Gjanicës synon valorizimin e brigjeve të lumit, përmes gjelbërimit dhe ndërtimit të ndërtesave publike për qëllime sportive-kulturore e të shërbimit dhe rehabilitimin selektiv sipas nevojave, të rrjetit infrastrukturor.
Projekti parashikon sistemimin e ujërave të zeza dhe ujërave të shiut në zonën e shtratit të lumit, rehabilitimin mjedisor të lumit dhe krijimin e një peizazhi rekreativ për shtratin e lumit. Po ashtu, sigurohen rrjete rrugore të mirëlidhura për këmbësorët, hapësira publike dhe në tërësi, një peizazh i përmirësuar infrastrukturor.
Ky projekt parashikon gjithashtu rinovimin e fasadave dhe restaurimin e ndërtesave të përfshira në ansamblin e qendrës së qytetit, ndërtimin e rrugëve për këmbësorët, krijimin e rrugëve të shkurtra të ecjeve në natyrë dhe fasilitete të tjera për këmbësorët.
Lumi Gjanica, dikur një mrekulli natyrore, për shumë vite u keqpërdor nga bizneset, të cilat e shndërruan atë në një vendgrumbullim plehrash dhe hidrokarburesh.
Lumi Gjanica, me një gjatësi prej 42 km, buron nga Mallakastra dhe përshkon qytetin e Fierit. Ai është degë e Semanit dhe buron nga pjesa jugore e malit të Shpiragut, përshkon gjithë trevën e Mallakastrës, kalon mes përmes qytetit të Fierit dhe derdhet në Seman, në afërsi të Mbrostarit./atsh
