Ndërsa ditët kalojnë, hetimet e autoriteteve greke për të gjetur autorët, të cilët vranë Karolinën 20-vjeçare, përpara burrit të saj dhe foshnjës 11 muajshe në shtëpinë e tyre në Glyka Nera, po përparojnë me shpejtësi.
“Ta Nea” shkruan në një artikull se rrethi për të zbuluar autorët e krimit po ngushtohet dhe në listë janë 30 kriminelë të dyshuar, që po futen në “sitë” dhe kontrollohen të gjitha lëvizjet e tyre.
“Në të njëjtën kohë, bandat e të huajve janë nën syrin e autoriteteve, ndërsa videot nga kamerat e sigurisë po shqyrtohen hap pas hapi” thotë artikulli.
Policia, vijon më tej shkrimi, ka formuar profilin e vrasësve dhe identifikimi i tyre konsiderohet çështje ditësh. Falë dëshmisë së burrit 32-vjeçar të Karolinës, autoritetet kanë në duart e tyre përshkrimin e kriminelit që vrau 20-vjeçaren.
Hetuesit pritet që t’i ndihmojnë shumë qelizat telefonike, ku gjurmimi vijon pasi autoritetet greke dyshojnë se kriminelët kishin kontakte me njëri tjetrin në zonën ku ndodhi grabitja në periferi të Athinës.
