Ministri i Brendshëm, Sandër Lleshaj, reagon për aksionin e gjerë anti-drogë të policisë në disa qytete të vendit, ku u arrestuan 40 persona, mes të cilëve edhe dy punonjës policie.
Lleshaj shkruan në “facebook” se procesi i ndarjes së policisë nga ata që nuk e meritojnë nderin e të shërbyerit në radhët e saj do të vijojë me rigorozitet të plotë.
Mesazhi i Lleshajt:
Policia e Shtetit, SHÇBA dhe Prokuroria finalizuan sot një operacion të rëndësishëm, në sajë të të cilit, krahas të tjerëve, u arrestuan edhe dy punonjës policie për përfshirje në veprimtari kriminale.
Procesi i ndarjes së Policisë nga ata që nuk e meritojnë nderin e të shërbyerit në radhët e saj do të vijojë me rigorozitet të plotë.
Policia është jo vetëm imazhi i drejtuesve të saj, por edhe i vetë shoqërisë. Si e tillë ajo duhet dhe do të jetë larg kujtdo që nuk i shërben me nder dhe angazhim interesit publik.
Përgëzime për këtë operacion të suksesshëm për Policinë, SHÇBA dhe Prokurorinë! 🇦🇱
