Ish-ministri dhe analisti Besnik Mustafaj ka komentuar situatën politike në vend, duke nisur nga djegia e mandateve të opozitës dhe reagimet nga ana e maxhorancë e ndërkombëtarëve.
“Përvoja që kam unë në marrëdhëniet ndërkombëtare më bën ti relativizoj këto reagime. Opozitës i kërkohet që të shkojë mbrapsht, ndërsa opozita ka shkuar aty që nuk mund të kthehet më. Opozita nuk ka më asnjë bazë ligjore për të rimarrë mandatet. Rikthmi në Kuvend siç ja kërkojnë ndërkombëtarët është i pamundur. Presioni i ndërkombëtarëve është pa sukses”- tha ai.
Mustafaj tha se nuk është opozita pengesë për çeljen e negociatave dhe integrimin pasi sipas tij nuk janë realizuar objektivat e vendosura nga KE.
“KE vuri disa objektiva për negociatat të cilat nuk janë realizuar. Përmendja tani e destinacionit të çeljes së negociatave si një pengesë nga opozita është një shantazh pa vlerë. Opozita nuk është pengesë reale për integrimin. Nuk ka mundësi Basha të bëjë ndryshimet kushtetuese edhe sikur PS të jetë dakord.
Nuk ka mundësi të jetë pjesëmarrëse për ndryshimet kushtetuese opozita. Basha tani duhet të flasë për format e protestës. Sistemi elektoral është një sitëm ligjor dhe Basha duhet të sqarojë se çfarë ndryshimesh kërkon”- tha Mustafaj.
I pyetur për protestën e radhës të opozitës në 16 mars, Mustafaj u shpreh se pjesëmarrja e njerëzve është e rëndësishme, por sipas tij nuk mjaftojnë vetëm protestat, por opozita duhet të ofrojë një platformë të gjerë ku nuk perjashtohet dialogu me qeverinë.
“Protesta është e domosdoshme dhe pjesëmarrja e njerëzve, por nuk është e mjaftueshme. Protesta duhet të shoqërohet me veprime të tjera politike të cilat nuk po i shohim. Unë besoj se tani ka një konsolidim të protestës.
Tashmë Basha dhe ekipi i opozitës duhet të ofrojë një platformë të gjerë ku nuk përjashtohet dialogu me qeverinë. Dialogu është pjesë e sistemit dhe nuk duhet të përjashtohet. Basha duhet të bëjë fushatë për informimin e të huajave. Ata janë të vëmendshëm, por duan argumente”- tha Mustafaj.
