Që prej mbrëmjes së pardjeshme, policia dyshonte se personi që u vra nga shkëmbimi i zjarrit me Forcat e Ndërhyrjes së Shpejte, ishte Admir Murataj.
Për këtë, efektivë të policisë shkuan në banesën e Muratajt në afërsi të Kalasë së Prezës ku i kërkuan bashkëshortes dhe të afërmve që të paraqiteshin në morg për të bërë identifikimin.
Por edhe pse 47-vjeçari u identifikua, për policinë mbetet mjaft e vështirë gjetja e bashkëpunëtorëve të tij.
Në fshatin Dritas, shumë pranë vendit ku ndodhi shkëmbimi i zjarrit, policia nisi një aksion të gjerë për gjetjen e grabitësve të tjerë, të cilët dyshohet se janë më shumë se 4 persona.
Operacioni i Forcave Special nisi gjatë orëve të para të mëngjesit, ndërsa e gjithë zona përreth fshatit, por edhe në rrethinat e Kamzës, aty ku u gjet mjeti tjetër i djegur po ushtrohen kontrolle banesash.
Në krye të forcave të policisë ishin dhe drejtori i Krimeve të Rënda, Tonin Vocaj dhe ai i Rendit e Sigurise, Gjovalin Loka.
