Një mendim për botën e futbollit nga Pele, natyrisht, vlen miliarda herë më shumë sesa një bisedë tifozësh në lokal. Ikona braziliane jep një opinion absolut në rrjetet sociale për kthimin e Cristiano Ronaldos te Manchester United.
Kur flet ai, të tjerët vetëm e dëgjojnë. Është eminenca më e madhe e futbollit në botë, një dëshmi e gjallë e mrekullisë së lojës së top-këmbës në dekada. Nëse Pele flet, edhe dikush si Cristiano Ronaldo ul kokën.
Legjenda braziliane komenton me një postim në Instagram kthimin e yllit portugez te “Djajtë e Kuq”: “Nuk ka ndjenjë më të mirë sesa të pushtosh botën dhe të kthehesh në shtëpi. Ji gjithmonë i lumtur, Cristiano”.
(Photo by Robert Cianflone/Getty Images)
Me pak fjalë, një “investim” i tillë nga CR7 i ka pëlqyer shumë lojtarit që është kandidati kryesor për t’u mbajtur mend si më i miri i të gjitha kohërave. Pasi të kesh marrë lavde të tilla (edhe pse nuk është hera e parë) nga një legjendë e tillë, çfarë tjetër mund të kërkojë një futbollist prej karrierës së tij?
Natyrisht, komenti i Peles nuk trajtohet nga Cristiano si komenti i ndonjë tifozi. Me gjithë respektin e duhur, gjendet koha për t’iu përgjigjur brazilianit, midis një fluturimi nga Portugalia në Angli.
Kështu, Ronaldo përgjigjet: “Është gjithmonë shumë mirë të kthehesh në një shtëpi, ku tashmë ke qenë i lumtur. Faleminderit për mbështetjen tuaj, Pele”.
Por, duke e njohur pesë herë fituesin e “Topit të Artë”, kush e di nëse do të ishte përgjigjur në të njëjtën mënyrë, me lajka dhe qetësi, nëse braziliani do t’i kishte shkruar atij, si shaka, diçka si “po, por akoma më i miri jam unë”.
