Shefi i Komisariatit të Policisë Sarandë, Syrja Bellaj është shkarkuar nga detyra me firmë të Kryepolicit Ardi Veliu. Ky i fundit ka mbledhur në zyrë në Tiranë prej mëngjesit të gjithë Shefat e Komisariateve.
Nuk dihet nëse Syrja Bellaj ka qenë prezent në mbledhje dhe shkarkimi i menjëherëshëm nga detyra i është komunikuar aty për aty, apo duke e ditur “fatin” e tij pas ultimatumit të Edi Ramës, ai nuk ka ardhur fare në Tiranë.
Syrja Belllaj do të zëvendësohet në këtë post nga Klodian Kondi.
Megjithatë, ky shkarkim i shefit të Policisë së Sarandës vjen një ditë pas ultimatumit të Edi Ramës për ngjarjen e ndodhur pak kohë më parë në qytetin bregdetar, ku u plagosur pronari i Club Orange Spiro Iljadhi dhe një turist shqiptaro-amerikan.
Ngjarja ndodhi në orët e para të mëngjesit, në një kohë që Club-i duhet të ishte mbyllur. Sipas Ramës, kjo ishte e patolerueshme dhe ai vetë i kishte kërkuar Ardi Veliut që gjithë zinxhiri komandues në Sarandë të shkarkohej nga detyra.
