Këngëtarja e njohur Ronela Hajati, e cila do të përfaqësojë Shqipërinë në “Eurovision” ka treguar se po kalon një periudhë të vështirë pavarësisht suksesit që ka korrur muajt e fundit.
Ronela Hajati postoi një shkrim në një sfond të zi në Instastory. Ajo shkruan se po kalon një nga periudhat e saj më të këqija, dhe është shumë e vetmuar pasi sipas saj “askujt nuk i plas”.
“Gjithë jetën time kam qeshur dhe kam qenë optimiste, madje edhe në ditët e mia të këqija… Por tani jam në gjendjen time më të keqe dhe nuk e keni idenë se sa shumë jam duke luftuar ndërkohë që akujt nuk i plas për mua. Ndihem shumë e vetmuar në gjithë këtë… Ti nuk e di asnjëherë se çfarë po kalon dikush”, ka shkruar këngëtarja.
Këngëtarja u shpall fituese e Festivalit të RTSH-së mes polemikave dhe kritikave, pasi disa kolegë të saj e konsideruan si këngë tallavaje “Sekret”.
Ajo është renditur si artistja e parë që do performojë në Eurovision, pas shortit të ndarjes së performancave në gjysmëfinalen e Eurovision Song Contest 2022 që u zhvillua në Palazzo Madama e Casaforte degli Acaja.
“Ok, tani jam e frikësuar”, shkroi Ronela Hajati, e cila do të duhet të përfaqësojë në mënyrë dinjitoze Shqipërisë, duke marrë parasysh faktin se e gjithë vëmendja do jetë tek ajo pasi është këngëtarja e parë që do performojë në Eurovision këtë vit.
