Edhe këtë fundjavë, sytë e qytetarëve dhe medias janë kthyer sërish në Velipojë, ku pak ditë më parë qyteti u trondit nga një masakër që la 4 viktima.
Këtë herë, në një hotel të qytetit, katër anëtarët e një familjeje, me mbiemër Gjoka kanë mbetur të plagosur dhe me djegie në 85-90% të trupit, nga shpërthimi i një bombole.
Të plagosurit mësohet të jenë Alketa Gjoka 40 vjece, Daniela Gjoka 19 vjece, Klarisa Gjoka 15 vjece dhe Enrik Gjoka 12 vjec.
Shpërthimi ka ndodhur në katin e parë të hotelit, ku ndodhet edhe kuzhina e tij.
Kati i parë i hotelit është thuajse totalisht i shkatërruar dhe në oborr ndodhet edhe bombula e gazit e cila u bë shkak i ngjarjes së rëndë.
Nga raportimet e para, dyshohet që në hotel nuk ka pasur pushues të tjerë.
Hoteli ndodhet në plazhin e Velipojës, përballë rrugës numër 5 në zonën kryesore.
Qytetarët që kanë dëgjuar këtë shpërthim kanë menduar se mund të ishte dinamit apo lëndë plasëse se ka qenë një zhurmë e madhe. Shpërthimi është dëgjuar shumë në plazhin e Velipojës.
Informacioni paraprak nga Policia
Më datë 04.07.2021, rreth orës 06:45, në fshatin Pulaj-Plazhë, rruga Nr.5, Velipojë, Shkodër, në një hotel tre katësh ka shpërthyer një bombul gazi, ku si pasojë janë dëmtuar shtetasit A. Gj. 40 vjeçe, D. Gj. 19 vjeçe, K. Gj. 15 vjeçe, dhe E. Gj. 12 vjeç, të cilët u dërguan për ndihmë mjeksore më të specializuar në Spitalin e Traumës Tiranë
Grupi hetimor nën drejtimin e Prokurorisë po vijon punën për sqarimin e plotë të rrethanave të ngjarje.
