Teksa na ndajnë vetëm pak orë nga mbyllja e këtij viti, JOQ Albania ka shpallur fituesin e titullit “Personazhi i Vitit 2019”, i cili u përzgjodh nga votat tuaja në sondazhin e publikuar disa ditë më parë.
Plot 37,837 qytetarë shqiptarë votuan për personazhin e tyre të preferuar nga 13 emrat e përzgjedhur nga redaksia e JOQ Albania, të cilët vinin nga fusha të ndryshme të jetës dhe kanë qenë protagonistë në ngjarjet më të bujshme që kanë ndodhur përgjatë këtyre 12 muajve, duke dhënë kontributin e tyre, secili sipas fushës që mbulon.
Shqiptarët kanë vendosur që titullin “Personazhi i Vitit 2019” e meriton imami dhe bamirësi i mirënjohur, Elvis Naçi, njeriu i cili me punën e tij të palodhshme u ka qëndruar pranë shqiptarëve të varfër dhe spikati këto ditë me kontributin e tij në ndihmë të personave të prekur nga tërmeti, duke fituar admirimin dhe respektin e qytetarëve.
I votuar nga 16,151 shqiptarë, Elvis Naçi, përmes fondacionit të bamirësisë “Firdeus” që ai drejton, arriti të mbledhë një shifër rekord donacionesh financiare për të prekurit nga tërmeti i 26 nëntorit, prej 10 miliardë lekësh.
Menjëherë pas tij, në vendin e dytë si më i votuari është zgjedhur gazetari patriot Marin Mema me 10,321 vota, i cili ka rifreskuar kujtesën e shqiptarëve. Mema, së bashku me Mario Kepin gjithashtu mblodhën shumë fonde për të prekurit nga tërmeti.
Ndërsa i treti, me 3279 vota, renditet Dilaver Nelaj, i njohur ndryshe si shqiptari me numrin më të madh të protestave individuale në vend. Ai ka dhënë gjithmonë mesazhe të qarta reflektimi për bashkëkombasit e tij shqiptarë, përmes pankartave dhe parrullave,
Renditja e plotë:
1. Elvis Naçi – 16,151 vota
2. Marin Mema – 10,318 vota
3. Dilaver Nelaj – 3279
4. Sadak, qeni i Policisë së Kosovës – 2291 vota
5. Halil Kastrati – 1359 vota
6. Neritan Liçaj – 1190
7. Arbër Hajdari – 880 vota
8. Luljeta Bozo – 780 vota
9. Edi Rama – 693 vota
10. Taulant Kopliku – 423 vota
11. Bebe Rexha – 255 vota
12. Arba Kokalari – 179 vota
13. Lutfi Kastrati – 162 vota
JOQ
