3 persona janë arrestuar pas ngjarjes së rëndë që ndodhi dje në Durrës, ku vdiq një punonjës 19-vjeçar, pasi u tërhoq nga vinçi.
Personat e arrestuar janë Rendi Biçaku, Nazmi Varaku, Bledar Troplini.
Burime bëjnë me dije se një nga të arrestuarit, Nazmi Varaku, 64 vjeç, me funksion manovrator i makinerisë, dyshohet të ketë goditur me mjetin e punës viktimën, punonjës i kësaj firme gjithashtu, shtetasin R. B.
Njoftimi i policisë:
Specialistët për Hetimin e Krimeve të Komisariatit të Policisë Durrës arrestuan në flagrancë, për veprën penale “Shkelja e rregullave të mbrojtjes në punë”, shtetasit: R. B., 27 vjeç, me funksion përgjegjës turni, në firmën përpunimit të kontenierëve në portin e Durrësit.
N.V., 64 vjeç, me funksion manovrator i makinerisë. B. T., 42 vjeç, me funksion kryemekanik i ofiçinës.
Arrestimi i këtyre shtetasve u bë sepse, për shkak të moszbatimit të rregullave të mbrojtjes në punë, ditën e djeshme, në vendin e quajtur “Sheshi i Kontenierëve” në portin e Durrësit, punonjësi i kësaj firme, shtetasi R. B. është aksidentuar me pasojë vdekjen, nga një mjet pune i kësaj firme, që po drejtohej nga shtetasi N. V.
Materialet i kaluan Prokurorisë, për veprime të mëtejshme.
