Gjatë 10 muajve të parë të vitit numri i velierave, kroçerave dhe jahteve turistike që janë ankoruar në portin e qytetit jugor bregdetar, ka shënuar një rritje të dukshme.
Drejtori i Portit të Vlorës, Adi Malaj, tha për ATSH-në se “gjatë periudhës janar-tetor në portin e Vlorës kanë ardhur 91 veliera dhe 76 kroçera, jahte dhe katamarane”.
“Vitet e fundit Porti i Vlorës është bërë pjesë e axhendës turistike të Mesdheut, gjë që argumentohet edhe me kërkesat në rritje të turistëve të kësaj kategorie”, – theksoi Malaj.
Sipas tij, përmirësimi i infrastrukturës portuale, asaj të qytetit dhe standardet e duhura të shërbimeve dhe të sigurisë, janë disa nga faktorët që kanë nxitur dhe rritur interesin e turistëve të kësaj kategorie të vijnë në Vlorë, për të kaluar orë pushimi në qytet.
Në axhendën e qëndrimit të turistëve që mbërrijnë në Vlorë me jahte, përfshihen shëtitje në qytet, vizita në objekte dhe vende të ndryshme historike,si Apolonia, Ardenica, etj.
Ata ndalen edhe në baret dhe restorantet përgjatë “Lungomares”, që është tashmë hapësira e preferuar e vizitorëve të huaj.
Porti i Vlorës është kthyer tashmë në një pikë të rëndësishme të itinerarit të anijeve turistike që përshkojnë Mesdheun. Bashkëpunimi i frytshëm mes “Portit Detar” Vlorë sh.a, dhe kompanive turistike vendase e të huaja ka rritur në mënyrë të ndjeshme numrin e turistëve që mbërrijnë në portin e Vlorës./atsh
