Një pako e dyshimtë është gjetur ditën e sotme në aeroportin e Rinasit, duke vendosur alarmin.
Mësohet se pakoja është konstatuar gjatë procedurës së skanimit të disa pakove në ambientet e godinës së Kargos. Pas ekzaminimit të Njësisë Antieksploziv të Repartit Special RENEA, rezultoi se pakoja nuk kishte probleme.
Ndërkohë grupi hetimor vijon veprimet verifikuese, me qëllim dokumentimin e plotë ligjor të këtij rasti.
Njoftimi:
Shërbimet e Komisariatit të Policisë Rinas janë njoftuar se gjatë skanimit të disa pakove në ambientet e godinës së Kargos, është konstatuar një pako e dyshimtë.
Menjëherë pas njoftimit, janë kryer të gjitha veprimet procedurale për sigurinë e shtetasve që ndodheshin në këto ambiente apo pranë tyre.
Nga veprimet e shpejta ekzaminuese, të kryera nga Njësia Antieksploziv e Repartit Special RENEA, në bashkëpunim me shërbimet e Komisariatit të Policisë Kufitare Rinas, Forcat e Ndërhyrjes së Shpejtë dhe ato të Drejtorisë së Antiterrorit, rezultoi se pakoja nuk kishte probleme.
Grupi hetimor vijon veprimet verifikuese, me qëllim dokumentimin e plotë ligjor të këtij rasti.
